कार्तिक १२, सल्यान ।
सल्यानको थारमारेमा शारीरिक अपाङ्गता परिक्षण घुम्ती स्वास्थ्य शिविर सम्पन्न भएको छ ।
बागचौर नगरपालिका सल्यानको आयोजना तथा विकलाङ्ग मित्र समूह/अपांग बाल अस्पताल तथा पुनस्थापना केन्द्र (HRDC) बनेपाको सहयोगमा १८ वर्षसम्मका शारीरिक अपाङ्गता भएका बालबालिकाहरूको उपचार, पहिचान तथा पुनर्स्थापनका लागि आयोजित घुम्ती स्वास्थ्य शिविर प्राथमिक स्वास्थ्य केन्द्र थारमारेमा सम्पन्न भएको हो ।
शिविरमा बागचाैर नगरपालिका भित्रका विभिन्न वडाका शारीरिक अपाङ्गता भएका बालबालिकाहरूको स्वास्थ्य परीक्षण, उपचार र पुनर्स्थापन सेवा प्रदान गरिएको थियो।
शिविरमा जम्मा ७६ बालबालिकाले निःशुल्क स्वास्थ्य सेवा प्राप्त गरेका छन् । शिविरमा ७६ जना बालबालिकाको अपाङ्गता पहिचान, ७ जनालाई सहायक सामग्री नापजाँच तथा वितरण, ५ जनालाई डाक्टर कन्सल्टेशन, ६० जनालाई औषधि वितरण र ४ जनाको शल्यक्रिया भर्ना मिति निर्धारण गरिएको थियो।
शिविर उद्घाटन कार्यक्रममा बोल्दै बागचाैर नगरपालिकाका नगर प्रमुख जनकराज गौतमले अपाङ्गता भएका बालबालिकाको पहिचान, उपचार र पुनर्स्थापनका लागि यस्ता शिविरहरू प्रभावकारी माध्यम भएको बताउनुभयो । बागचौर नगरपालिका समुदायमै पुग्ने स्वास्थ्य सेवा विस्तारमा निरन्तर प्रतिबद्ध रहेको बताउदै शिविरले अपाङ्गता भएका बालबालिकाका लागि स्थानीय स्तरमै सहज स्वास्थ्य सेवा दिएको उल्लेख गर्नुभयो ।
बागचौर नगरपालिका वडा नं. २ का वडा अध्यक्ष दिपेश डाँगीको अध्यक्षतामा सुरु भएको कार्यक्रममा बागचाैर नगरपालिकाका नगरप्रमुख जनराज गौतमको प्रमुख आतिथ्यता, कल्याणकारी अपाङ्ग सेवा संघ सल्यानका अध्यक्ष कृष्ण बहादुर बुढा लगायतको आतिथ्यता रहेको थियो ।
शिविरमा डाक्टर निरञ्जन थापा, अपाङ्गता भएका बालबालिकाका अभिभावक,स्वास्थ्यकर्मीहरु र स्थानीयहरुको सहभागीता रहेको थियोे ।
प्रकाशित मिति: १३ कार्तिक २०८२, बुधबार २१:५३